ማንኛውም አየር ፀባይ ሆነ አፈር ዓይነት የሚመከር ዛፍ-1

ኢራንን ጨምሮ በርካታ የአረብ አገራት በረሃማ ምድርን አየር ፀባይ ለማልማት ተጠቅመው ውጤታማ የሆኑበት የዛፍ ዘር ነው-ሲድረት!

ሲድረት በሚል አካባቢያዊ ስም የምናውቀው ይህ ዛፍ በሳይንሳዊ መጠሪያው ‘ኮንክረብስ ኢረክት’ (Conocarpus erectus) ይባላል። ስለ ዛፉ የሚታወቁ እውነታዎች መካከል:-

ሲድረት የሚተከልበት መሬት አይነት፤

ይህ ተክል ጠንካራና ረጅም እድሜ ያለው ዛፍ ሲሆን እንደ አካባቢ ማስዋቢያ ቢጠቀሙት የተሰጠውን ቅርፅ የሚቀበል ተፈጥሮ አለው። ከፍተኛ የፀሀይ ሀይልን የመቋቋም አቅም ያለው ከመሆኑም ባሻገር የተተከለበት አፈር አሸዋማ ሆነ ጨዋማ ሲድረት ሁሉንም ሁኔታዎች ይቋቋማል። በዚህም ለጨዋማ የባህር ዳርቻዎች በስፋት ይፈለጋል።  ተክሉ በካርበን የተበከለ አየርን ለማፅዳት የላቀ ሚና አለው። የአልካላይን አፈርን እና ከፍተኛ ሙቀትን መቋቋም ከብዙ እፀዋት የሚለይበት ተፈጥሮ ነው። ዛፉን ለግቢ ማስዋብ፣ ለጥላ አጥር ወይም ለመኪና መንገድ አካፋይ ጨምሮ ለጥላ ሆነ በቅርፅ ለመቀምቀም ሊያገለግል ይችላል።

እንጨቱ

የሲድረት እንጨት ለጣውላ ስራ አገልግሎት ሲያውሉት ይስተዋላል። እንጨቱ ለማገዶ አገልግሎት፣ ለከሰል መዋል የሚችል ነው። በመካከለኛው ምስራቅ ጭሱን ለባህላዊ ህክምና ይጠቀሙታል።

ቅርፊት

የሲድረት ተፈላጊ ክፍሉ ቅርፊቱ ነው። ቅርፊቱ ከፍተኛ መጠን ያለው ታኒን ያለው በመሆኑ ለማስዋቢያነት ሲቀመም ይስተዋላል። በሚታወቅበት አካባቢ ቅርፊቱ ተጠራቅሞ ለገበያ ይውላል።

ለመኖ

እንስሳት አርቢዎች የሲድረትን ዛፍ ለእንስሳት መኖነት በስፋት ያለሙታል። ለከብት እርባታ በተክሉ ቅጠልና ቅርንጫፎች ውስጥ የሚገኝ ንጥረ-ምግብ ለእንስሳት ጤና ጠቃሚ ከመሆኑ ባሻገር የሚመገቡት ላሞች የተሻለ የወተት ምርት ይሰጣሉ።

ጨዋማ መሬትን መቋቋም

ሲድረት ጨዋማ መሬትን ለማከም የሚያገለግል የተክል አይነት በመሆኑ ሌሎች እፀዋት በማይለሙበት ስፍራ ሁሉ መልማት ይችላል። በአረብ አገራት አሸዋማ መሬት ላይ ለደን ልማት ትግበራ በዋለባቸው ፕሮጀክቶች ሁሉ ውጤማ ነበር።

እድገት

ሲድረት በመጀመሪያዎቹ የእድገት ደረጃው በዓመት ከ2-3 ሜትር ያድጋል። ይህም በአጭር ገዜ ጥላ ለማግኘት አይስችላል። ዛፉ እስከ 10 ሜትር ርዝመት እና 3 ሜትር ስፋት ማደግ ይችላል።